Sherzod Qudbiyev

Sherzod Davlyatovich Qudbiyev (oʻzbekcha: Шерзод Давлятович Қудбиев; 1981-yil 12-aprel) – 2025-yil 20-noyabrdan Urbanizatsiya va uy-joy bozorini barqaror rivojlantirish milliy qoʻmitasi raisi. Oʻzbekiston Respublikasi Soliq qoʻmitasi raisi (2020—2022; 2023—2025), Oʻzbekiston Respublikasi iqtisodiyot va moliya vaziri (2022—2023). Prezidentning davlat xizmati va hokimiyat vakillik organlari bilan hamkorlik qilish masalalari boʻyicha maslahatchisi (2019—2020), Oʻzbekiston Respublikasi mehnat vaziri (2018—2019).

Sherzod Qudbiyev
1-Urbanizatsiya va uy-joy bozorini barqaror rivojlantirish milliy qoʻmitasi raisi
Mansab davri 2025-yil 20-noyabrdan
Hukumat boshligʻi	Abdulla Oripov (siyosatchi)
Prezident	Shavkat Mirziyoyev
Oʻtmishdoshi	lavozim taʼsis qilingan
Oʻzbekiston Respublikasi Soliq qoʻmitasi raisi
Mansab davri 2023-yil 3-avgust – 2025-yil 20-noyabr
Hukumat boshligʻi	Abdulla Oripov (siyosatchi)
Prezident	Shavkat Mirziyoyev
Oʻtmishdoshi	lavozim qayta taʼsis qilingan
Vorisi	Farruh Poʻlatov
Mansab davri 2020-yil 13-maydan – 2022-yil 30-dekabrgacha
Oʻtmishdoshi	Behzod Musayev
Vorisi	lavozim bekor qilingan
1-Oʻzbekiston Respublikasi iqtisodiyot va moliya vaziri
Mansab davri 2022-yil 30-dekabrdan – 2023-yil 3-avgustgacha
Hukumat boshligʻi	Abdulla Oripov (siyosatchi)
Prezident	Shavkat Mirziyoyev
Oʻtmishdoshi	lavozim taʼsis qilingan
Oʻzbekiston Prezidentining davlat xizmati va hokimiyat vakillik organlari bilan hamkorlik qilish masalalari boʻyicha maslahatchisi
Mansab davri 2019-yil 30-avgustdan – 2020-yil 13-maygacha
Prezident	Shavkat Mirziyoyev
Oʻtmishdoshi	Umar Ismoilov
Vorisi	Gʻofurjon Mirzayev
Oʻzbekiston Respublikasi Bandlik va mehnat munosabatlari vaziri
Mansab davri 12-aprel 2018-yildan – 30-avgust 2019-yilgacha
Hukumat boshligʻi	Abdulla Oripov (siyosatchi)
Prezident	Shavkat Mirziyoyev
Oʻtmishdoshi	Oʻktam Haitov
Vorisi	Nozim Husanov
Shaxsiy maʼlumotlari
Tavalludi	12-aprel 1981-yil (1981-04-12) (44 yosh) Fargʻona
Mukofotlari
Unvoni	Soliq xizmatining 3-darajali davlat maslahatchisi

Biografiyasi

Taʼlimi

2003-yilda Fargʻona politexnika institutini tugatgan.

Mehnat faoliyati

2003—2010-yillarda Mehnat vazirligida turli lavozimlarda, 2010—2012-yillarda Oʻzbekiston Respublikasi Vazirlar Mahkamasining makroiqtisodiy rivojlantirish departamenti bosh mutaxassisi, 2012—2015-yillarda Mehnat vazirligi ilmiy-tadqiqot markazi direktori, 2015—2016-yillarda Oʻzbekiston Respublikasi Vazirlar Mahkamasining makroiqtisodiy rivojlantirish departamenti rahbarining oʻrinbosari, 2016—2018-yillarda Toshkent shahri Mirzo Ulugʻbek tumani hokimi vazifalarida ishlagan.

Hukumatdagi faoliyatini 2018—2019-yillarda Oʻzbekiston Respublikasi Mehnat vaziri sifatida boshlagan.

2019—2020-yillarda Oʻzbekiston Prezidentining davlat xizmati va hokimiyat vakillik organlari bilan hamkorlik qilish masalalari boʻyicha maslahatchisi.

2020-yil may oyidan 2022-yil oxirigacha hamda 2023-yil avgustdan 2025-yil 20-noyabrgacha – Oʻzbekiston Respublikasi davlat soliq qoʻmitasi raisi.

Shu bilan birga, 2022-yildan 2024-yil Toshkent davlat iqtisodiyot universiteti bilan birlashtirilgunga qadar – Oʻzbekiston Respublikasi davlat soliq qoʻmitasining fiskal instituti rektori vazifasini ham bajargan.

2022-yildan – Oʻzbekiston stol tennisi federatsiyasi raisi vazifasini ham bajarib kelmoqda.

2022-yil 30-dekabrdan 2023-yil 3-avgustgacha – Oʻzbekiston Respublikasi iqtisodiyot va moliya vaziri.

2025-yil 20-noyabrdan Urbanizatsiya va uy-joy bozorini barqaror rivojlantirish milliy qoʻmitasi raisi.

Sud ishi

Sherzod Qudbiyev 2021-yilda Oliy Majlis deputati Rasul Kusherbayev ustidan O‘zbekiston Respublikasi Fuqarolik kodeksining 99, 100, 1021 va 1022-moddalari hamda Fuqarolik protsessual kodeksining 33, 189 va 191-moddalariga asosan ish qoʻzgʻatishni soʻrab sudga murojaat qilgan. Uning sudga murojaat qilishiga Rasul Kusherbayevning 2021-yil 23-fevralda human.uz saytiga bergan intervyusi sabab sifatida koʻrsatilgan. Shikoyat arizasida Kusherbayev oʻz xatti-harakatlari bilan soliq organlariga 4.6 mlrd soʻm maʼnaviy zarar yetkazilgani daʼvo qilingan.
2021-yil may oyida Davlat soliq qoʻmitasi birlashgan kasaba uyushmasi vakillari hamda Oliy Majlis Qonunchilik palatasi deputati Rasul Kusherbayev uchrashib, masalani sudgacha olib bormasdan hal qilishga kelishib olgach, sud ishi toʻxtatilgan.

Jurnalistlar bilan munosabati

Sherzod Qudbiyev jurnalistlar bilan munosabatlariga doir chiqishlari bilan ham mashhur boʻlgan. Jumladan, 2021-yilda „Toshkent 5 tashabbus harakati“ doirasida Qudbiyevning yoshlar bilan uchrashuvida „obnal ishi“ haqida soʻragan jurnalistni „hayp uchun“ savol bermaslikka chaqiradi.
2022-yil yanvardagi matbuot anjumanida jurnalist qizga „xalq nomidan gapirish huquqi yoʻqligi“ni bildirib, jurnalistni „yosh qizcha“ deb atagani internetda faol muhokama qilingan.

Tanqidlar

2020-yil oktyabr oyida internetda Sherzod Qudbiyevniki ekanligi aytilgan audio xabarlar tarqaladi. Unda DSQ raisi tadbirkorga ortiqcha toʻlangan QQS summasi oʻz vaqtida qaytarilmagani, uning hisob raqamini yopib qoʻyilganidan gʻazablanib, xodimni haqorat qilgan. Keyinchalik Qudbiyev audio oʻziga tegishli ekanligini tan olgan.
2021-yil may oyida Qudbiyev qalampir.uz jurnalistiga bergan qisqa intervyusida tarqalgan audio uchun oʻgʻil-qizi va ota-onasidan uyalganligini taʼkidlagan

Men rahbar shaxs og‘ir vaziyatlarda ham vazminlik bilan harakat qilishi lozimligi to‘g‘risidagi fikrimda qat’iy turaman va yuqoridagi holatda o‘zim shu fikrga qarshi harakat qilganimni tan olaman. Yuzaga kelgan vaziyatda mas’uliyatni his qilgan holda, men yuqoridagi xodim bilan alohida suhbatlashdim va biz birgalikda yoqimsiz hodisaga to‘liq barham berdik. Lekin bu meni mas’uliyatdan forig‘ qilmaydi.

Videoning tarqalishi borasida quyidagilarni aytib o‘tmoqchiman.

Hech kimga sir emaski, soliq tizimida islohotlar boshlangan, shu bilan birga juda ko‘p muammolar yig‘ilib qolgan. Afsus bilan aytish kerakki, haligacha ayrim holatlarda tadbirkorlarga nisbatan “sog‘in sigir” sifatida qarab, ularning hisobidan o‘z xizmat vazifalarini, eng yomoni – ayrim hollarda esa shaxsiy manfaatlarini ko‘zlayotgan shaxslar uchrab turibdi.

Yuqoridagi videoda aynan shunday holatlar muhokama qilingan edi. Birinchi holatda – tadbirkorga ortiqcha toʻlangan QQS summasi oʻz vaqtida qaytarilmagan, ikkinchi holatda – asossiz ravishda hisob raqami band qilinib, undagi mablagʻlar undirilmoqchi boʻlgan.

Masaladan yaqindan xabardor boʻlganlar yaxshi bilishadiki, xodimlarning bunday mas’uliyatsiz hatti-harakatlari videoda aytib oʻtilgan ikkala tashkilotning ham faoliyati toʻxtatilishi kabi jiddiy oqibatlarga olib kelgan edi. Hozirda ushbu korxonalarning faoliyati toʻliq qayta tiklanishiga erishildi.

Afsuski, bugungi kunda bu kabi masalalarni hal etishda shaxsan mening aralashuvim talab etilmoqda

— Sherzod Qudbiyev,

Mukofotlari

2024-yil 24-avgustda Doʻstlik ordeni bilan mukofotlangan.